أفضل 5 هواتف تحت سعر 10 آلاف جنيه

بصراحة كدا، نزول السوق النهاردة تشتري موبايل بـ 10 تلاف جنية دي بقت حيرة مش سهلة خالص، زمان كان المبلغ دة يجيبلك جهاز فلاج شيب محترم، لكن دلوقتي هو بداية الفئة المتوسطة الاقتصادية. وعشان متضيعش فلوسك في جهاز يندمك بعد شهرين، لفيتلك السوق وجمعتلك افضل 5 موبايلات يستاهلو كل قرش تحت ميزانية الـ 10,000 جنية تقريباً.

أفضل 5 هواتف تحت سعر 10 آلاف جنيه

1. سامسونج Galaxy A16

لو انت شخص بتدور ع الامان وعايز موبايل يقعد معاك سنين من غير وجع دماغ، فدايما السامسونج هو خيارك الاول. الموبايل دة بيقدملك شاشة سوبر اموليد محترمة جدا الوانها تشبع العين وترددها سلس، ومعالج كويس يمشي معاك في التصفح واستخدام السوشيال اليومي بدون تهنيج يذكر. عيبة الوحيد؟ ان العلبة بتيجي فاضية يدوبك السلك، يعني هتنزل تدفعلك 500 جنية زيادة عشان تشتري راس شاحن محترم، بس قصاد كدة بتاخد دعم تحديثات طويل الامد يخليك مطمن.

2. شاومي Redmi Note 14

دة بقى بتاع الناس اللي بتحب المواصفات العالية ع الورق وف الحقيقة. شاومي كالعادة بتقدم احسن قيمة مقابل سعر. شاشة الموبايل خرافية AMOLED بدقة عالية وسطوع محترم تحت الشمس. الكاميرا بتاعته بتطلع صور جامدة جدا في الاضاءة العالية واكتر من كافية للفيسبوك والانستا. العيب المشهور لشاومي هو سينسور المكالمات اللي احيانا بيعلق والشاشة متقفلش وانت بتتكلم، بس من ناحية السرعة والشاحن السريع والجراب اللي في العلبة، هو صفقة رابحة جداً.

3. ريلمي Realme C75

لو انت شغلك ف الشارع، او بتسوق كتير، او مش فاضي تقعد جنب الشاحن كل شوية، روح لريلمي وانت مغمض. الجهاز دة ميزتة الكبيرة هي البطارية الجبارة اللي بتكمل يوم ونص واحيانا يومين مرتاح من غير ما تفكر فيها. غير ان سوفت وير ريلمي خفيف جدا ومش بيهنج حتى لو ضغطت عليه. الشاشة IPS عادية مش اموليد يعني السواد مش فاحم زي السامسونج، لكن مقابل التحمل وقوة استقبال الشبكات دة يعتبر بطل الشارع ف الفئة دي.

4. اوبو Oppo A60

الموبايل دة معمول للناس اللي ايديها بتوقع الموبايلات كتير. خاماته وتصميمه مقاوم للصدمات والوقعات الخفيفة بشكل ممتاز، وماسكته ف الايد شيك جدا ووزنه خفيف. ادائه اليومي ناعم ومستقر اوي بفضل واجهة اوبو، والشحن بتاعه سريع ومريح. يعيبه بس ان دقة الشاشة HD مش FHD، فلو انت مهووس بمشاهدة الافلام بوضوح فائق هتحس بفرق بسيط، لكن كاعتمادية وشكل شيك وموبايل يعيش، اوبو كسبانة هنا.

5. تكنو Spark 30 Pro

الحصان الاسود اللي ناس كتير بتغفل عنه. الموبايل دة بيقدملك مساحات تخزين ضخمة ورامات عالية بنفس سعر الاجهزة التانية اللي بتديك مساحة اقل. شاشته اموليد جميلة جدا وتصميمه من الضهر شبه موبايلات غالية جداً. الكاميرات مقبولة جدا ع سعره، بس واجهة النظام فيها شوية اعلانات وتطبيقات محتاجة منك تقعد تمسحها اول ما تفتح الجهاز.

خلاصة الموضوع

في النهاية، المعادلة سهلة: عايز سوفت وير وشاشة وبطارية بتعيش سنين اختار سامسونج، عايز امكانيات وشاشة سريعة وشاحن صاروخ خد شاومي، وعايز حمار شغل وبطارية تقعد ايام ومقاومة للبهدلة روح لريلمي او اوبو. المهم تنزل تسأل ف المحلات وتفاصل، لان الاسعار اليومين دول بتفرق من محل لمحل بتاع 300 او 400 جنية مرتاح.